疫境下升職的舊同事請我吃飯，不是 lunch，是 dinner，隆而重之地與我分享更上一層樓的喜悅，感動。
相識相知十多年，事無不可對人言：「請你食 Amber，我張 credit card 有 buy one get one free。」
熟歸熟，始終不習慣白吃人家一頓飯，於是象徵式回禮，輪到我請他吃 lunch。
哎唷，不吃由自可，吃完才知道原來那頓飯之前，發生了一段小插曲。
真的嗎？六星級酒店，點會咁呀？「真㗎，我都好嬲，陣間 send 段錄音畀你聽。」點解有錄音？「佢打我手提，我飛咗線去公司，公司電話有錄音。」
聽完之後，覺得其實也沒有什麼，不過以六星級酒店的標準來說，又真的讓人有點驚訝。
是這樣的。
朋友收到餐廳電話，我聽得出，職員的語氣是十分禮貌的。
「郭生，同你講聲唔好意思先，其實係咁嘅：因為晚飯限聚令六人轉咗四人，所以都影響咗我哋嘅 table arrangement，所以想睇吓你方唔方便可以將個 booking 改去第二晚？」
六人轉四人，關二人枱乜嘢事？
最後朋友當然不肯，否則我們也不會吃到那頓飯了。
酒店其實沒有「錯」，但以六星角度來看，完全不合格。
酒店要配合六轉四限聚措施，fine，那麼便向六人枱的客人解釋便是了。啲抬拆唔倒又想 keep business？咪諗計 (如 upgrade 入 private room 之類)，總之砌掂佢為止，而唔係用先向散枱啲客或唔係熟客嚟入手咁「三星」嘅處理手法。
如果真係絕對絕對無辦法要 approach 二人枱個客 (可能六人枱嗰啲全部都係何家郭家嘅超級 VIP)，首先，要好小心語氣同措詞，只可用輕輕試探形式，而且最好主動附帶一個令人順氣啲嘅 gesture (如加送香檳 or small discount)。
但若果客人有表示不滿或拒絶，便應立即道歉 and back off，就是這樣簡單。
六星級服務不是要職員扮高檔，而是用最想別人對待你的方法去對待別人。
Search